(កំពង់ចាម)៖ ឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម និងឯកឧត្តម ខ្លូត ផន ប្រធានក្រុមប្រឹក្សាខេត្តកំពង់ចាម អញ្ជើញប្រគល់ម៉ូតូ ០២គ្រឿង ដែលជាអំណោយដ៏ថ្លៃថ្លារបស់លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ជូនគ្រួសារវីរកងទ័ព ០២គ្រួសារ ដែលបានរងគ្រោះខូចខាតម៉ូតូទាំងស្រុង អំឡុងពេលបំពេញតួនាទីជាយោធា កាលពីព្រំដែនកម្ពុជា-ថៃ មានបញ្ហា។
ពិធីប្រគល់នេះដែរ ធ្វើនៅសាលាខេត្តកំពង់ចាម នៅថ្ងៃទី០៨ ខែមករា ឆ្នាំ២០២៦ ដោយមានការប្រគល់ ទទួលម៉ូតូផ្ទាល់ដល់ដៃភរិយារបស់យោធាទាំង ០២គ្រួសារ។
គ្រួសារយោធាទាំងពីរ ដែលបានទទួលម៉ូតូ រួមមាន៖ ទី១.លោកស្រី ម៉ោង មួយហ៊ុន ទីកន្លែងកំណើតនៅឃុំស្វាយខ្សាច់ភ្នំ ស្រុកស្រីសន្ធរ ខេត្តកំពង់ចាម មានស្វាមីឈ្មោះ តឹក វ៉ាន់ដេត ជាយោធា បម្រើការងារនៅកងពលតូចថ្មើរជើងលេខ៥១ កំពុងឈរជើងនៅជួរមុខ និងទី២.លោកស្រី ទូច ស៊ីថា ទីកន្លែងកំណើតនៅ ឃុំព្រែកក្របៅ ស្រុកកងមាស ខេត្តកំពង់ចាម មានស្វាមីឈ្មោះ លុក ចាប ជាយោធា បម្រើការងារនៅកងពលតូចអន្តរាគមន៍លេខ៦ កំពុងឈរជើងនៅជួរមុខ ខេត្តឧត្តរមានជ័យ។
ឆ្លៀតក្នុងឱកាសនោះដែរ ឯកឧត្តម អ៊ុន ចាន់ដា ក៏បាននាំនូវការផ្តាំផ្ញើសាកសួរសុខទុក្ខពីសម្តេចតេជោ ហ៊ុន សែន ប្រធានព្រឹទ្ធសភា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ដែលជានិច្ចកាល ប្រមុខថ្នាក់ដឹកនាំ តែងតែគិតគូរ ខ្វល់ខ្វាយអំពីសុខទុក្ខ របស់គ្រួសារវីរកងទ័ព និងបងប្អូនប្រជាពលរដ្ឋភៀសសឹកទាំងអស់ ដោយមិនទុកឱ្យនរណាម្នាក់ រងទុក្ខលំបាកនោះឡើយ៕
About the Author
